سياسة الخصوصية — جمعيتي
آخر تحديث: 18 نوفمبر 2026
جمعيتي تطبيق لتنظيم الجمعيات (الحصّالة) ومتابعتها بين الأعضاء في الكويت. التطبيق ما يستلم ولا يحوّل ولا يحفظ أي فلوس؛ كل الدفعات تصير مباشرة بين الأعضاء خارج التطبيق. هالصفحة توضّح شنو نجمع، وليش، ومع منو نشاركه، وشلون تحذفه.
البيانات اللي نجمعها
- رقم الجوال: لتسجيل الدخول برمز يوصلك على واتساب.
- الاسم ورقم ومض: يشوفهم أعضاء جمعياتك عشان يعرفون منو يحوّلون له.
- بيانات الجمعيات: الجمعيات اللي تنشئها أو تنضم لها، الأدوار، الدفعات وتأكيدها، النزاعات، وتصويت الإلغاء. هذي تبين لأعضاء نفس الجمعية بس.
- صور التحويل (اختيارية): لو رفعت صورة إثبات تحويل، تنحفظ بشكل آمن ويشوفها أعضاء نفس الجمعية المعنيين بالدفعة.
- درجة الموثوقية: نحسبها من التزامك بمواعيد الدفع، ويشوفها أعضاء جمعياتك.
- التنبيهات: رمز التنبيهات لجهازك عشان نرسل لك تذكيرات الدفع، وسجل التنبيهات اللي يظهر في التطبيق.
- موافقتك على قوانين الجمعية: رقم نسخة القوانين ووقت الموافقة.
جهات الاتصال
لو اخترت رقم من جهات اتصالك، التطبيق يفتحها على جهازك بس عشان تختار رقم. ما نرفع جهات اتصالك ولا نحفظها؛ نستلم الرقم اللي تختاره فقط.
الإعلانات
التطبيق يعرض إعلان صغير (بانر) في الصفحة الرئيسية عن طريق Google AdMob. نطلب إعلانات غير مخصّصة، لكن Google ممكن تجمع معلومات من جهازك (مثل معرّف الإعلانات وعنوان IP ونوع الجهاز) لعرض الإعلان وقياسه ومنع الاحتيال. تقدر تعرف أكثر من سياسة Google، وتقدر تعيد ضبط معرّف الإعلانات أو تقيّده من إعدادات جهازك.
مع منو نشارك بياناتك
- أعضاء جمعياتك: اسمك ورقم ومض ودفعاتك ودرجة موثوقيتك في الجمعيات المشتركة.
- مزوّدي الخدمة اللي نستخدمهم لتشغيل التطبيق: الاستضافة والتخزين، واتساب (Meta) لإرسال رمز الدخول، إرسال التنبيهات (Google / Apple / Expo)، والإعلانات (Google AdMob).
- الجهات الرسمية إذا طلب القانون ذلك.
ما نبيع بياناتك لأي أحد.
حذف البيانات
- حذف الحساب من صفحة "حسابي": نمسح اسمك ورقمك ورقم ومض، وتطلع من الجمعيات اللي ما بدت. ما تقدر تحذف حسابك وأنت في جمعية شغالة لين تخلص أو تنلغي.
- الجمعيات اللي خلصت أو انلغت تظل في سجل باقي أعضائها باسم "عضو محذوف".
- حذف الجمعيات المؤرشفة: كل عضو يقدر يحذف الجمعية من عنده، ولما يحذفها كل الأعضاء تنمسح بياناتها كلها (الدفعات والصور والنزاعات) من السيرفر. نحتفظ بملخص صغير لحساب درجة الموثوقية فقط.
- نحتفظ بسجل عمليات مختصر لأغراض الأمان وحل الخلافات.
الأمان
نستخدم اتصالات مشفّرة وصلاحيات وصول محدودة. صور التحويل ما تنفتح إلا بروابط مؤقتة لأعضاء الجمعية المعنيين.
الأطفال
التطبيق موجّه لمن عمرهم 18 سنة فما فوق.
التواصل
لأي سؤال أو طلب بخصوص بياناتك: alhajerih@hotmail.com — حمد الهاجري
ممكن نحدّث هالسياسة؛ نعدّل تاريخ "آخر تحديث" ونبلّغك داخل التطبيق إذا كان التغيير مهم.